MBONA UNALIA....?

MBONA UNALIA...?

Majaribu uyapitiayo yasikufanye ukate tamaa, bali kaza mwendo katika imani. Hakuna jaribu lililo zaidi ya imani yako; ukiona jaribu linakupata fahamu kuwa utalishinda kwa sababu imani uliyonayo ni kubwa kuliko hilo jaribu ulionalo mbele yako, na Mungu akuongozaye ni Mkuu kuliko kila kitu.
Yawezekana umeomba sana ili jaribu hilo litoweke lakini linaonekena kupamba moto; Usife moyo. Tambua hapo umefika katika wakati wa kutumia mamlaka; Kemea kwa jina la Yesu, kwa imani nawe utauona ukuu wa Mungu. Pindi uonapojaribu linapamba moto ndipo ujue muda wa muujiza wako umetimia.
Tumia mamlaka uliyopewa katika jina la Yesu Kristo. Kumbuka jinsi Farao na jeshi lake walivyowakaribia wana wa Israeli kando ya bahari, hapo ndipo muda wa ushindi kwa wana wa Israeli ulikuwa umewadia. Neno la Mungu linasema:

"BWANA akamwambia Musa, Mbona unanililia Mimi? Waambie wana wa Israeli waendelee mbele. Nawe inua fimbo yako, ukanyoshe mkono wako juu ya bahari, na kuigawanya; nao wana wa Israeli watapita kati ya bahari katika nchi kavu." - KUTOKA 14:15-16.

Wakati huo jeshi la Misri likiongozwa na Farao liliwafata wana wa Israeli; tunaona Musa akaanza kumlilia Mungu kwa sababu alidhani Mungu amewatelekeza. Lakini cha ajabu tunaona Mungu anamwambia Musa:

"...Mbona unanililia Mimi? Waambie wana wa Israeli waendelee mbele..."

Hata wewe pia haupaswi kukata tamaa na kuanza kulia au kulaumu; Mungu amekupa mamlaka makubwa sana kupitia jina la Yesu. SONGA MBELE NA TUMIA MAMLAKA ULIYOPEWA KATIKA JINA LA YESU KRISTO.